近幾個月，美國AI產業頻頻有「刁」，於是接二連三出現單日股價奇跡：「嘩！AMD一日升近四成」、「OMG！甲骨文飆四成幾」、「大癲！連時代的眼淚Nokia都升三成」。呢啲公司市值隻隻幾百幾千億美金，一日就炒高三幾成，睇到懷疑人生。
當然，單日升勢唔代表將來升勢，有啲股價其實已經回返晒。不過你可能都想知，到底呢班科技公司玩緊乜游戲？其實一個term就講晒——「多角戀循環交易」（circular deals）。要明咩係 circular deals 唔難。簡單講，A公司課金1億俾B公司作為投資，而B公司再用返呢筆錢，去買A公司嘅product。結果呢1億轉個圈又返去A公司。左手交右手，A公司收入好似多咗，兩間公司估值都大咗。
係有啲圍威喂feel嘅，因為要不是A公司投資，B公司就未必有錢幫襯A公司。講到呢度，我忽然諗起《喜劇之王》嗰句：「你唔做雞？我邊有錢呀？我冇錢點養你呀？」今轉科網「多角戀循環交易」，核心人物就有 Nvidia 同埋 OpenAI。最典型例子係，今年9月，Nvidia 宣佈向 OpenAI 投資最多 1000 億美元。呢筆錢嘅用途，就係買返 Nvidia 自家出產嘅AI晶片，約400萬至500萬粒。呢個量多唔多？係好多！相當於 Nvidia 今年全年 AI 片出貨量。
叫得「多角戀」，當然人物關係圖錯綜複雜。啱啱講完 Nvidia 同 OpenAI，就喺消息公佈第二日，OpenAI 又公佈同甲骨文簽咗張 3000 億美元雲端服務合約。OpenAI 分五年，每年課金 600 億俾甲骨文。據《金融時報》報道，甲骨文為咗接呢單生意，要大手採購 Nvidia 晶片——涉及400億美金。啲錢又兜兜轉轉返去 Nvidia。至於甲骨文競爭對手 CoreWeave，佢可以話係 Nvidia 親生仔，Nvidia 一方面拎住 CoreWeave 逾5％股權；另一方面又係 CoreWeave 嘅客戶，簽咗張總值63億美元長約，仲要豪氣保底：「賣唔晒嘅 cloud capacity，我哋包曬，直到2032年。」CoreWeave要接大生意，最緊要就係有足夠晶片；供貨嘅當然又係 Nvidia ，又執多轉。
講到呢到，已經有啲亂係咪？其實可以更亂。CoreWeave 最大嘅客戶係微軟同 OpenAI。微軟係 OpenAI 股東，又同 Nvidia 合作；Nvidia 又係 OpenAI 投資者兼供貨商。仲有間AMD，作為Nvidia嘅對手，為咗拎 OpenAI 嘅單，近乎係送股票拎隻客返嚟！（簽約內容係：OpenAI 買夠一定數量晶片，AMD 就發認股證，俾 OpenAI 以每股1美仙，認購AMD 最多 10% 股份。）最新， Amazon 都加入埋 Open AI 個朋友圈，旗下AWS簽咗張380億美元大單。